ఆంధ్రప్రదేశ్ రాష్ట్రంలో కూటమి ప్రభుత్వం కొలువుదీరిన తర్వాత ప్రజల ముంగిటకే పాలనను తీసుకువెళ్లాలనే సంకల్పంతో ప్రజా సమస్యల పరిష్కార వేదిక (పీజీఆర్ఎస్) కార్యక్రమాన్ని అత్యంత ప్రతిష్టాత్మకంగా చేపట్టింది. ముఖ్యమంత్రి నారా చంద్రబాబు నాయుడు ప్రతి సమీక్షా సమావేశంలోనూ ఒక్క అర్జీదారుడు కూడా అసంతృప్తితో వెనుతిరగకూడదని, ప్రతి సమస్యకు నాణ్యమైన పరిష్కారం లభించాలని అధికారులకు స్పష్టమైన ఆదేశాలు జారీ చేస్తున్నారు. అయితే జిల్లా స్థాయిలో క్షేత్రస్థాయి అధికారుల తీరు మాత్రం ముఖ్యమంత్రి ఆశయాలకు విరుద్ధంగా సాగుతోంది. సామాన్యుల కష్టాలు తీరకపోగా, అధికారుల ఉదాసీనత వల్ల ప్రజలు మరింత ఇబ్బందులకు గురవుతున్న పరిస్థితి కనిపిస్తోంది.
ప్రస్తుతం జిల్లాలో నమోదైన గణాంకాలను పరిశీలిస్తే వ్యవస్థలో ఉన్న లోపాలు స్పష్టంగా అర్థమవుతున్నాయి. జిల్లా మొత్తం మీద ఇప్పటివరకు 39,427 అర్జీలు రాగా, అందులో 31,088 అర్జీలు పరిష్కరించినట్లు అధికారులు రికార్డుల్లో చూపిస్తున్నారు. సుమారు 2,642 అర్జీలు పెండింగ్లో ఉండగా, పరిష్కారమైనట్లు భావించిన వాటిలో 964 అర్జీలు తిరిగి రీఓపెన్ కావడం ఆందోళన కలిగించే అంశం. ఒక అర్జీ రీఓపెన్ అయిందంటేనే సదరు అధికారి ఆ సమస్యను సరిగ్గా పరిష్కరించలేదని లేదా అర్జీదారుడిని తప్పుదోవ పట్టించారని అర్థం చేసుకోవచ్చు. ఇటీవల ప్రజాప్రతినిధులు, కలెక్టర్, ఎస్పీలతో నిర్వహించిన సమీక్షలో ముఖ్యమంత్రి స్వయంగా ఈ రీఓపెన్ అర్జీల పట్ల తీవ్ర అసహనం వ్యక్తం చేయడం గమనార్హం.
క్షేత్రస్థాయిలో తహసీల్దార్లు, ఆర్డీవోల కార్యాలయాల చుట్టూ సామాన్య ప్రజలు కాళ్లరిగేలా తిరుగుతున్నా ఫలితం ఉండట్లేదు. మారుమూల గ్రామాల నుండి వందల రూపాయలు ఖర్చు చేసుకుని, పని మానుకుని జిల్లా కేంద్రానికి వచ్చే అర్జీదారుల గోడు వినేవారే కరువయ్యారు. జిల్లా స్థాయి అధికారులు ఆ అర్జీలను తిరిగి సంబంధిత మండల అధికారులకే పంపడం వల్ల సమస్య మళ్లీ మొదటికే వస్తోంది. ఎక్కడైతే సమస్య పరిష్కారం కాలేదో, మళ్లీ అదే అధికారుల వద్దకు అర్జీ వెళ్లడం వల్ల బాధితులకు న్యాయం జరగడం లేదు. కనీసం అర్జీదారుడితో మాట్లాడకుండానే, క్షేత్రస్థాయిలో విచారణ జరపకుండానే కంప్యూటర్లో ‘సమస్య పరిష్కరించబడింది’ అని నమోదు చేయడం అత్యంత దురదృష్టకరం.
ముఖ్యంగా ఇళ్ల స్థలాల విషయంలో అధికారుల తీరు విస్మయానికి గురిచేస్తోంది. తమకు ఉండటానికి నీడ లేదని, ఇళ్ల స్థలం కావాలని నిరుపేదలు అర్జీలు పెట్టుకుంటే, వారికి స్థలం కేటాయించకుండానే మీ సమస్య పరిష్కారమైందని ఎండార్స్మెంట్లు ఇస్తున్నారు. అసలు సమస్యకు సంబంధం లేని సమాధానాలు ఇస్తూ అర్జీలను మూసేయడం వల్ల ప్రజల్లో ప్రభుత్వ యంత్రాంగంపై నమ్మకం సన్నగిల్లుతోంది. దీనిపై కలెక్టర్ సైతం ఆగ్రహం వ్యక్తం చేస్తూ, సంబంధిత అధికారుల పనితీరును తప్పుబట్టారు. కొందరు బాధితులు పట్టుదలతో మళ్లీ మళ్లీ అర్జీలు రీఓపెన్ చేస్తుంటే, మరికొందరు అధికారుల నిర్లక్ష్యానికి విసిగిపోయి తమ గోడు ఎవరికి చెప్పుకోవాలో తెలియక మధ్యలోనే వదిలేస్తున్నారు.
ప్రభుత్వం ఎన్ని నిధులు ఖర్చు చేసినా, ఎన్ని వేదికలు ఏర్పాటు చేసినా అమలు చేసే అధికారుల్లో చిత్తశుద్ధి లేనప్పుడు ఆశించిన ఫలితాలు రావు. అర్జీల పరిష్కారం అనేది కేవలం రికార్డుల్లో అంకెల గారడీగా మిగిలిపోకూడదు. బాధితుడి ముఖంలో చిరునవ్వు కనిపించినప్పుడే ఆ పరిష్కారానికి విలువ ఉంటుంది. ఇప్పటికైనా జిల్లా యంత్రాంగం మేల్కొని, నాణ్యత లేని పరిష్కారాలు చూపే అధికారులపై కఠిన చర్యలు తీసుకోవాలి. అప్పుడే పీజీఆర్ఎస్ వేదిక ద్వారా సామాన్యుడికి నిజమైన న్యాయం అందుతుంది.
