తెలంగాణలో పదో తరగతి పరీక్షల రద్దుపై స్పష్టత – విద్యాశాఖ వివరణ
తెలంగాణ రాష్ట్రంలో విద్యావ్యవస్థలో మార్పులపై గత కొద్ది రోజులుగా విస్తృత చర్చ జరుగుతోంది. ముఖ్యంగా 2026-27 విద్యా సంవత్సరం నుంచి పదో తరగతి బోర్డు పరీక్షలు రద్దు చేయబడతాయన్న వార్తలు విద్యార్థులు, తల్లిదండ్రుల్లో ఆందోళనకు కారణమయ్యాయి. అయితే ఈ ప్రచారంపై తెలంగాణ విద్యాశాఖ తాజాగా స్పష్టతనిచ్చింది.
విద్యాశాఖ కమిషన్ ఓఎస్డీ డాక్టర్ జీనత్ మాట్లాడుతూ, తమ కమిషన్ ప్రభుత్వంకు సమర్పించిన నివేదికలో పదో తరగతి బోర్డు పరీక్షలను రద్దు చేయాలనే ఎలాంటి సిఫార్సు చేయలేదని ఖండించారు. ఈ విషయంలో వస్తున్న వార్తలు పూర్తిగా అవాస్తవమని ఆమె తెలిపారు. పదో తరగతి పరీక్షలు యథావిధిగా కొనసాగుతాయని స్పష్టం చేశారు.
అయితే విద్యావ్యవస్థలో కొంతమంది సూచించిన మార్పులలో భాగంగా ప్రస్తుతం విడిగా ఉన్న ఎస్ఎస్సీ (SSC) బోర్డు మరియు ఇంటర్మీడియట్ బోర్డును విలీనం చేయాలని ప్రతిపాదించినట్లు తెలిపారు. దీని ద్వారా విద్యా వ్యవస్థను మరింత సమగ్రంగా, సమర్థవంతంగా నిర్వహించవచ్చని భావిస్తున్నారు. అదేవిధంగా, 11వ తరగతి పబ్లిక్ పరీక్షలను మాత్రమే రద్దు చేయాలని సూచించినట్లు ఆమె వెల్లడించారు.
విద్యార్థులపై ఒత్తిడి తగ్గించడమే ఈ మార్పుల ప్రధాన లక్ష్యమని పేర్కొన్నారు. పాఠశాల స్థాయిలోనే మూల్యాంకనం మెరుగుపరిచే దిశగా చర్యలు తీసుకోవాలని కమిషన్ అభిప్రాయపడింది.
ఇటీవల సోషల్ మీడియాలో వస్తున్న తప్పుడు ప్రచారాలను నమ్మవద్దని డాక్టర్ జీనత్ విద్యార్థులు, తల్లిదండ్రులను కోరారు. అధికారిక సమాచారం కోసం ప్రభుత్వం లేదా విద్యాశాఖ విడుదల చేసే ప్రకటనలను మాత్రమే విశ్వసించాలని సూచించారు.
మొత్తానికి, పదో తరగతి పరీక్షల రద్దుపై వస్తున్న వార్తలు అసత్యమని స్పష్టమైంది. విద్యార్థులు ఎలాంటి ఆందోళన చెందకుండా తమ చదువులపై దృష్టి సారించడం అవసరం.
