తెలంగాణలో నేటి నుంచి పదో తరగతి పరీక్షలు – కఠిన నిబంధనల మధ్య నిర్వహణ
తెలంగాణ రాష్ట్రంలో పదో తరగతి (SSC) పబ్లిక్ పరీక్షల నిర్వహణకు అన్ని ఏర్పాట్లు పూర్తయ్యాయి. నేటి నుంచి (మార్చి 14, శనివారం) రాష్ట్రవ్యాప్తంగా పరీక్షలు ప్రారంభమయ్యాయి. ఈ పరీక్షలు ఏప్రిల్ 16 వరకు కొనసాగనున్నాయి. ఈ ఏడాది కూడా గత సంవత్సరం మాదిరిగానే ఓఎంఆర్ (OMR) షీట్ విధానాన్ని కొనసాగిస్తున్నారు. ఆన్సర్ బుక్లెట్కు జతచేసిన ఓఎంఆర్ షీట్ను విద్యార్థులు తప్పనిసరిగా ఉపయోగించాల్సి ఉంటుంది.
ఈ విధానం గురించి విద్యార్థులకు పూర్తి అవగాహన కల్పించేందుకు అధికారులు ముందుగానే నమూనా మోడల్ పేపర్లు మరియు వివరణాత్మక వీడియోలను అధికారిక వెబ్సైట్లో అందుబాటులో ఉంచారు. పరీక్షలు ప్రతిరోజు ఉదయం 9.30 గంటలకు ప్రారంభమవుతాయి. విద్యార్థులను ఉదయం 9.35 గంటల వరకు మాత్రమే పరీక్షా కేంద్రాల్లోకి అనుమతిస్తారు. ఆ తర్వాత ఆలస్యంగా వచ్చిన వారికి ప్రవేశం ఉండదని అధికారులు స్పష్టం చేశారు.
తెలంగాణ రాష్ట్రవ్యాప్తంగా మొత్తం 2,676 పరీక్షా కేంద్రాల్లో పరీక్షలను నిర్వహించనున్నారు. ప్రతి పరీక్షా కేంద్రంలో సీసీ కెమెరాలు ఏర్పాటు చేసి పర్యవేక్షణ చేపడుతున్నారు. పరీక్షల నిర్వహణలో ఎలాంటి అక్రమాలు జరగకుండా కఠిన చర్యలు తీసుకుంటున్నారు. పరీక్షా కేంద్రాల్లోకి సెల్ఫోన్లు, స్మార్ట్ వాచ్లు, ఇతర ఎలక్ట్రానిక్ పరికరాలు తీసుకురావడం పూర్తిగా నిషేధించారు. విద్యార్థులు ఎగ్జామ్ ప్యాడ్, హాల్ టికెట్, పెన్ను, పెన్సిల్ మాత్రమే తీసుకురావాలని అధికారులు సూచించారు.
పరీక్షలను పారదర్శకంగా నిర్వహించేందుకు ప్రత్యేకంగా ఫ్లయింగ్ స్క్వాడ్ బృందాలను నియమించారు. మొత్తం 144 ఫ్లయింగ్ స్క్వాడ్లు, సిట్టింగ్ స్క్వాడ్లు పరీక్షా కేంద్రాలను తనిఖీ చేస్తాయి. హైదరాబాద్ మరియు పరిసర ప్రాంతాల్లోని పరీక్షా కేంద్రాల వద్ద పోలీసులు ప్రత్యేక భద్రతా ఏర్పాట్లు చేసి ఆంక్షలు విధించారు. విద్యార్థులు ఎలాంటి ఆందోళన లేకుండా పరీక్షలకు హాజరుకావాలని విద్యాశాఖ అధికారులు కోరుతున్నారు.
